• Сб. Июн 19th, 2021

Մթերքներ, որոնք կօգնեն հեշտությամբ կարգավորել զարկերակային բարձր ճնշումը

Янв 15, 2020

Զարկերակային գերճնշումը ներկայում ամենատարածված ու վտանգավոր խնդիրներից մեկն է, ուստի զարմանալի չէ, որ մասնագետները հորդորում են միշտ վերահսկողության տակ պահել ճնշման ցուցանիշները:

Այս հիվանդության զարգացման հավանականությունը կտրուկ բարձրանում է 50 տարեկանից հետո, ինչը կապված է հորմոնալ ֆոնի փոփոխության ու ճարպային հյուսվածքների ձևավորման հետ: Այս տարիքում բարձրանում է ինչպես ճարպակալման ու ավելորդ կիլոգրամների կուտակման, այնպես էլ մետաբոլիկ խանգարումների ու բորբոքումների զարգացման հավանականությունը, իսկ նման խնդիրները շատ վտանգավոր են սրտամկանի ու արյունատար անոթների համար:

Սակայն մասնագետները նշում են, որ կան սննդամթերքի որոշ տեսակներ, որոնց գործածությունը թույլ կտա բնական ճանապարհով նվազեցնել զարկերակային ճնշման ցուցանիշներն ու կպաշտպանի զարկերակային գերճնշման զարգացումից:

Ձեր ուշադրությանն ենք ներկայացնում 7 մթերք, որոնք կօգնեն կարգավորել զարկերակային բարձր ճնշումը:

Բնական յոգուրտ

Ոչ շատ յուղոտ կաթնամթերքը կալցիումի հիանալի աղբյուր է, իսկ այն զարկերակային բարձր ճնշման դեմ պայքարող հիմնական բաղադրիչներից մեկն է: 250-300 գրամ բնական յոգուրտն օրգանիզմին տալիս է կալցիումի օրական անհրաժեշտ քանակության մոտ 30%-ը, ուստի զարկերակային բարձր ճնշման դեպքում հարկավոր է սննդակարգում յոգուրտ ներառել:

Բանան

Այս միրգը հարուստ է կալիումով, որն ամենակարևոր միկրոտարրերից է: Միջին չափի բանանը պարունակում է մոտ 420 մգ կալիում, որն այս տարրի օրական անհրաժեշտ չափաբաժնի մոտ 9%-ն է: Բացի այդ, բանանը պարունակում է մանրաթելեր, որոնք բարելավում են աղիների միկրոֆլորայի վիճակը, ինչն էլ, իր հերթին, ազդում է օրգանիզմի բոլոր գլխավոր համակարգերի վրա:

Ճակնդեղ

Ճակնդեղը պարունակում է մեծ քանակությամբ ազոտի օքսիդ, որը բարենպաստ ազդեցություն է ունենում անոթների վրա և նվազեցնում է զարկերակային ճնշումը: Հետազոտությունները ցույց են տվել, որ ճակնդեղի հյութն օգնում է նվազեցնել սիստոլիկ ճնշումը 4-5 միավորով:

Սխտոր

Առողջության ազգային ինստիտուտի տվյալներով՝ սխտորի մեջ պարունակվող ալիցին միացությունը նվազեցնում է զարկերակային ճնշումը: Այս մթերքի արդյունավետությունը բարձրացնելու համար ցանկալի է այն համադրել հզոր միզամուղ ազդեցություն ունեցող ու հակաօքսիդանտային հատկություններով օժտված մթերքի հետ, ինչը թույլ կտա նվազեցնել արյան թանձրությունը և կբարելավի զարկերակների վիճակը:

Վարսակ

Ամբողջահատիկ վարսակի գործածությունն արյան մեջ խոլեստերինի մակարդակը նվազեցնելու արդյունավետ միջոց է, իսկ խոլեստերինի բարձր մակարդակը համարվում է աթերոսկլերոզի ու դրա հետևանքով նաև զարկերակային գերճնշման ու սրտանոթային այլ հիվանդությունների զարգացմանը նպաստող գործոններից մեկը: Հետազոտությունները ցույց են տվել, որ արյան մեջ «վատ» խոլեստերինի մակարդակի նվազեցման հարցում վարսակը նույնքան արդյունավետ է, որքան դեղամիջոցները:

Մանրաթելեր

Մանրաթելերի պարունակությամբ լավագույն մթերքն ամբողջահատիկ մթերքն է, որն էլ համարվում են ամենից օգտակարն արյունատար անոթների համար: Օրական երեք բաժին ամբողջահատիկ մթերք օգտագործելը կարող է նվազեցնել սրտանոթային հիվանդությունների զարգացման հավանականությունը 15%-ով:

Կիվի

Օսլոյի Համալսարանական կլինիկայի գիտնականների հետազոտությունները ցույց են տվել, որ օրական երեք հատ կիվի ուտելը կարող է զգալիորեն նվազեցնել զարկերակային ճնշումը: Կիվին հարուստ է հակաօքսիդանտներով, որոնք շատ օգտակար են: Օրինակ՝ ընդամենը մեկ կիվիի մեջ պարունակվում է վիտամին C-ի օրական անհրաժեշտ չափաբաժնի մոտ 40%-ը: Բացի այդ, այս մթերքը պարունակում է լյուտեին կարոտինոիդային հակաօքսիդանտ, որն արդյունավետ կերպով պայքարում է զարկերակային գերճնշման դեմ:

Նյութի աղբյուրը՝ medikforum.ru